頑固的寶貝

喊了已經一個鐘多了，上星期開始訓練家姐自己一個訓，陪了她睡後，我就去大床訓，但過去一會兒她便哭醒！今天決心怎哭我也不過去，聽到她哭了一個多小時，全家也不太好受，我很想出去陪她睡，究竟怎樣才可成功令她半夜自己訓回去，是否還沒到時候呢？

我要陪你訓呀！

尋晚想訓練lam lam自己訓，之前都訓練過一個星期左右，但因為佢病左就暫停，變左老公自己訓，我同lam lam訓大床！叫佢自己訓，佢話：「我要陪你訓！」佢似乎主次掉亂了！

尋晚再試，佢好似好唔慣，碌左成個鐘先訓到，嗰時差不多十點半了！等佢訓左我就去番大床訓，一點幾就喊了，結果又去陪佢去完厠所再訓，我都訓著埋，四點幾我又過番去大床。

唉，剛睡著佢又喊，我剛同周公打招呼咋！本來叫老公搞定，但聽到佢不斷叫媽媽，又不忍心，怕佢番學沒精神，加上聽住佢喊，我咪又係訓唔到，唯有再陪佢，把心一橫就陪到天光了！很累，很像沒睡過一樣！所以成日覺得細佬實在太乖，很早就自己一個訓，也怪自己第一胎沒好好訓練lam lam, 明晚再努力，相信總有一天她會自己睡吧！

小別之後

今個週末, lam lam跟了嫲嫲回家住兩天，所以我地就剩係湊番源仔一個，挺易的，因為源仔可以乖乖地坐著自己玩玩具，玩上個幾小時，只要玩完幫佢收拾一下就可！家姐可能是女孩子，總要別人一起玩的，各有各優點吧！

尋日，lam lam回家了，我們都興高采烈地歡迎她，細佬本在房裡，也大叫要出來，看到兩口子褸埋一齊，真係十分興奮，願你們感情永遠這麼好！

邊個肚腩大？

前排兩個仔囡喺我面前，我見到佢地兩個肚腩頂住對方，就問家姐，邊個肚腩大d!? 佢答：「媽媽肚腩大d!」十萬個無奈亦反搏不了！

無人錫你？我錫你！

尋晚臨訓前，我同lam lam講，你就好啦！咁多人錫你，爸爸媽媽又錫你，爺爺嫲嫲又錫你，我細個嗰時無咁多人錫！佢即時話：「我錫你啦！」走埋黎錫左我一啖，滿足了！女孩子真窩心！

由講故事開始

近這個月，每晚同lam lam訓覺前都要求我說故事，唔通我d故事夠悶，容易入睡一d!?

我將一些自己兒時嘅故事逐一講比霖霖知，如「狼來了」、「小紅帽」、「三隻小豬」等，講完我覺得比較空泛就去圖書館借左些圖書一齊睇，亦等自己重溫一下，免得自己改劇情啦！

今日，我食過午飯後又去借書，放工同老公回家時，佢提議不如我將佢地嘅故事記低，好讓自己記住及佢地大個可看看。也好！其實喺lam lam出生時我已有想記低的衝動，但生小朋友及照顧他們實在太忙，最重要係懶，哈！就依家開始吧！