家姐的第一個一蚊雞

剛在星期日，

老公比第一個一蚊雞零用比霖，

依家學了基本加數的霖，

可以有少許零用錢了！

有人說不要太早給零用錢，

現在K3, 我覺得尚算可以，

有時霖去文具店也會同我講想要咩咩咩，

不過，霖源也很乖，

從沒扭要買什麼，

有了錢，佢就可以留意下個價錢，

自己再評估買唔買！

小時候，

爸媽從沒教我怎樣理財，

什麼也是自己學的，

但這正是人生必要面對的問題，

希望老公跟我可以教到她倆！

醫生，真的在醫人嗎？

我是一個極少看醫生的人！

還記得大學有次突然急病，

臨考試又燒又嘔，

感覺好嚴重，

所以看一下醫生，

但由於太耐沒看過醫生，

紀錄也找不到了，

才發現原來自己太耐沒看醫生了！

小病，流鼻水、咳，

我通常也沒看作一回事，

如覺不舒服買支橙汁喝了便是！

到有兩個小朋友，

實會有小病，

通常有燒就會看一下醫生，

始終中耳炎、肺炎等，

比較嚴重影響將來，

還是看一下醫生比較安全！

以前看開一個女醫生，

覺得佢幾細心，

但看久了，

或許生意少了，

醫德也沒了，

少許燒，沒說什麼就開抗生素，

有咳就咳水，鼻水就開鼻水藥，

真的在醫他們嗎？

看著一支支藥水，

其實只減低病徵，

吃了對身體，尤其小朋友，

寧舍傷身，

抗生素吃多了，

身體病菌適應多了，

就不會再有效！

記得有次源高燒入院，

那個老醫生說穿了，

外國是不會為細個六歲的小童處方藥品，

因為那些藥對身體弊多於利，

身體會咳嗽，是要咳出細菌來，

用藥停止身體的反應，

會令細菌遲遲咳不出來！

發燒是身體用熱力殺死細菌，

用藥降溫就令身體殺不了細菌！

不知道，

如不是確診了是什麼大病，

看他們精精神神，

會玩的就不吃過多的藥了！

幸好，兩個暫時也屬少病的一群，

希望以後更少啦，

連醫生也沒紀錄吧！

小一選校

話咁快就到家姐小一選校了！

星期六，去了兩間小學的小一簡介會/開放日，

第一原本鎖定放首位，

但經過一輪分析及再次聽簡介會，

覺得校長太沒領導能力，

與學校安排也較混亂，

因此，確定了另一間為首位了！

另一間唔算係happy school,

但距離家仍算近，

步行約十分鐘左右，

而且校長及老師的講解也有條理及方向，

可見到學校花了不少心機在不同學科中！

而且沒有一進校就分的精英班，

亦強調這六年不會分，

因為我也認同若過早標籤他們，

已經打擊了他們的自信或令入左精英班嘅人驕傲自滿！

雖然感到不會是很輕鬆嘅小學，

但覺得他們有方法令學習會較大效，

而且家長不太給予壓力，

相信對他們也不會太辛苦吧！

也有爭扎過不如選間較多活動，

少些功課的學校，

但若要在香港教育，

就必須跟所謂的大方向走，

表面happy嘅學校，

其實也會同樣有不同嘅壓力。。。

而且霖不太算活動型，

比較像爸媽般文靜怕羞，

應該較近及傳統些的學校會較適合！

四口子齊齊放暑假！

由於源霖是番全日制幼稚園，

所以夾埋週末都係得十五日暑假，

我同老公今年拎左七日大假陪佢地，

齊齊放暑假！

今個暑假沒去外地旅行，

只留港消費，

因為覺得去幾日用萬幾二萬實在太多了，

而且暑假機票價錢也是high high的，

留港用幾千蚊，都好寫意！

源霖也很愛住酒店，

同源霖的同學仔一家一齊在愉景灣酒店住一晚，

都好正！

難得兩家人的兩個小朋友也是同學仔，

大家也份外啱玩！

首先，一早就排排坐食個簡單早餐先！

接著就搭地鐵，

到欣澳站轉巴士，

原來有酒店巴士直達，

慳錢又方便！

喺酒店影下相，

個個都古古怪怪！

Checkin 完就去隔離個Epicland 玩，

暑假超多人！

最好玩是這個超長滑梯！

玩完食左個超耐嘅午餐，

哈！

留了手帶給剛來了的Yy,

因為源已訓了，

而且覺得太多人，

唔係點玩到。。。

等佢地玩陣，

可以比錢坐下馬車，

全行人好似都係第一次坐，

原本只可坐四個大人的馬車，

我地五個小朋友+兩個大人上哂去，抵！

夜晚食酒店嘅buffet,

食物不錯，

係兩個小朋友也要收費，

所以都要千幾蚊，比較貴！

不過間中食下無所謂啦！

朝早再食埋package嘅自助早餐，

游個靚水就checkout了！

姨丈。。。一路好走。。。

姨丈，

是一位愛說笑、好學、精力充沛的老人家，

沒想到會這樣離我們而去，

剩下的姨母及三個仔囡，

必定是最心痛的，

希望姨母花些時間，

心情會平伏些，不要再高血壓了。。。

昨天，

不停想像當時的情形，

要是一個懂得游泳的人，

看到朋友掉在海中，

相信也會奮不顧身的跳入水中，

但這樣賠上的可能是自己性命。。。

可能是天命，

只能慨嘆生命無常，

有些我都會間中想，

要是我或老公先行一步，

那時希望兒女們已經成年，

可以好好的照顧自己。。。

姨長，

一路好走。。。

源仔的出世

最近，有個想法，

好好將霖跟源仔的事好好記下，

待我老左或佢地大個可以睇番！

佢地第一件重要事一定是出世啦！

先講未出世，

我同老公一早已決定生兩個，

而且唔好隔太耐，

所以霖到13個月，

我們便想差不多要生第二胎了，

點知一個月內就bingo 左，

話都無咁快！

我地仲諗住要起碼兩三個月，

那就剛好六月出世同老公同月份，

不過呢d嘢也是緣份！

懷住源仔感覺比霖一半辛苦、一半舒服啦！

辛苦在年幾大左兩年，

個人又好肥好重，

最重時，達80公斤，痴左線！

所以成日腰酸背痛，

但就舒服在無咩嘔，

可以正常飲食！

經過上胎生b嘅驚險，

呢胎都好驚，

上胎經驗話我知，

開刀真係要好耐復原，

所以點我都選試順產，

條件是要40週內順產，

可能驚上胎開刀個肚太大有風險！

第38週開始產假，

無咩動靜，

變相陪霖玩多過安胎，

霖好好享受一下獨佔媽媽的時間啦！

等到開刀限期的前兩日夜晚十一二點，

終於開始陣痛，

之前聽講座話等到胎動密些先入院，

諗住訓埋覺先入院（始終屋企舒服好多！），

但越痛越密，個人又心掛掛，

訓到三四點還是入院吧！

入到去，

其實都係喺床訓住等，

後悔！還是沒有訓覺！

第二日朝，醫生鼓勵落床行，

痛緊點行播，

結果不太願落地，

間中行兩步，

等左大半日，

仲未生得，

夜晚等老公放工黎就拖住老公行，

一痛就唔郁得1-2分鐘左右，

等過左痛又行，

行左成晚又得個吉！

訓覺同行一樣，

一痛就醒，

但事關已日幾無訓，

好鬼眼訓，

斷斷續續地訓！

醒左仲比醫生串，

訓到覺即係唔太痛啦，

痛極通完頂都要訓下嫁！

到左開刀限期日的朝早八點，

檢查完子宮頸都未開，

唉，醫生一句；「你都係要開刀！」，

個心好灰，

痛左日幾又要開刀，

個心情好down.... 

仲排埋隊第二個開刀。

點知等左幾個字，

穿左羊水，

Yeah!

開心在唔使開刀，

但要繼續等。。。

陣痛越來越勁，

但我還是傻左咁冷靜，

超乖地一痛就吸氣呼氣，

無好似隔離唔同床位嘅媽媽咁鬼殺咁嘈！

就係咁就無人理我，

覺得我未生得，

唉，點解忍耐力咁好，

應該點都大叫，

忍到十二點左右，

痛得好密又好勁，

叫極姑娘檢查都無人理我，

用唔到藉口避我，

發覺唔對路，

後來才知無位生！

唉！總之點都叫救命話極痛入左去覇住先！

最後等到真係好辛苦，

竟然搵個醫生黎同我講佢有緊急手術做，要我等下！

我其實嗰刻莫名奇妙，

我順產有助產士就得，

搵個醫生黎做咩，

我又唔係等佢，

後尾知無床位真係有些嬲，

不過，公立係咁啦，吞左去！

等到下午四點三十三分，

痛左42小時多，

源仔終於出世了！

感動萬分，

同上次好唔同，

一生完沖一沖涼，

源就可趴在我心口，

咩痛都唔記得lu!

之前仲要做緊最恐怖的事：聯針，

唉，唔想再諗！

上胎順利餵人奶十三個月（有左源就停了沒餵），

所以今胎好有信心餵到，

就係有經驗，

今胎埋身後點都會再補奶粉，

因為知唔補，

大人細路都無得訓之餘，

過兩日出院好大機會退唔到黃就要無得番屋企！

所以點都埋完身補粉，

其實公立醫院有道好，

就係可以24小時放bb喺隔離，

有需要就餵，

但問題係，

新手媽，

一生完好攰，

又未上奶，又唔識餵，

聽到好多都係個b狂喊，

搞到媽媽都好大壓力，

不停餵，但無休息，

又忘了要狂飲水，

邊會夠奶，

所以兩三日根本唔太夠人奶媽退黃，

但政策上，退唔到黃個b就留院，

一留院就全奶粉，

搞到媽媽無得埋身餵，

對住個泵，難度又增加了，

惡性循環，

人奶路更難行！

好在點都補粉，

出院度黃指數，

剛剛合格，

番屋企後去健康院檢查就可！

湊第二胎比第一胎容易好多，

真係分到佢嘅喊聲，

幾時係肚餓，幾時係扮嘢扭抱，

尤其每次喊，霖都會喊，

扮有野要我幫，

喊多兩喊，扭抱的話，

通常喊多幾分鐘就等唔到訓左覺，

所以異常地好湊！

經驗所得，

佢地訓覺係要有嘢話佢知夠鐘訓覺，

頭兩三個月都係用奶咀，

但唔太work,

始終質感同真嘢差太遠，

唔太肯食，

而且奶咀嘅問題好多，

跌左又要消毒，對牙齒又唔好，

半夜跌左更加係煩，周圍搵，

搵到都好污穢，

點比佢食番！

最後，就轉左一訓就比條毛巾佢攬住，

又得播，

一見毛巾就攬住訓覺，

超乖！又可愛！

到依家三歲都仲有少少鍾情要毛巾拎住訓!

滿足又簡單的一餐：菇炒牛肉粒+蘿蔔洋蔥漢堡扒

上次整完漢堡扒老公話好味，

所以又再整，

上次略覺得太多肉有點實同乾，

今次加左一個半洋蔥同一條細蘿蔔，

無咁乾之餘也健康十足！

兩樣餸都好快搞掂，

因為可以一邊氣炸，

一邊炒牛肉，

加埋半個鐘左右，

煮完全部人都好快食完，

真是簡單又滿足的一餐！

菇炒牛肉粒：

材料：

加拿大牛肋肉粒一包

黑椒少許

糖少許

蠔油少許

做法：

1. 先用油略炒一下菇拿起

2. 再加少許油爆炒牛肉

3. 放菇回鑊加調味，搞掂！

蘿蔔洋蔥漢堡扒

材料：

洋蔥1個半

蘿蔔1小條

免治豬肉3x蚊

面粉2湯匙

豉油少許

胡椒粉少許

做法：

1. 洋蔥同蘿蔔切細粒

2. 加少少水煲15分鐘左右，待收乾水份

3. 將2及所有材料拌勻，弄成圓餅型

4. 用氣炸煱180度焗10分鐘，搞掂！

營養早餐：5分鐘準備嘅pizza

這款又快又好味嘅pizza是之前在營養師那裡學的，

底是嘉x彼得包，

查少少醬，加自己喜愛嘅材料，

再加芝士在面，

放焗爐（200度）焗10分鐘就搞掂！

叫個囡自己放材料，

又可當親子活動！

材料；

彼得包一包（3塊）

低脂沙律醬/茄醬才許

芝士碎少許

吞拿魚或三文魚2湯匙

粟米2湯匙

做法：

1. 將沙律醬或茄醬均勻查上彼得包

2. 放上吞拿魚或三文魚碎，加芝士

3.放入焗爐，200度，焗10分鐘即成！

這個是吞拿魚粟米批

這個是三文魚粟米批

無油少鹽漢堡扒

這週末做了漢堡扒做晚餐餸加聽日早餐，

這個也是用氣炸煱做的，

因此是無油少鹽，

做法簡單快趣！

初時老公問我係咪無落鹽，

我話少少啦（約半茶匙），

食食下竟然話好味，

下次整多點平時早餐食，

頓時開心哂！

材料：

免治豬肉約300克

免治牛肉約200克（這次買澳洲有機牛，竟然都係廿幾蚊，幾抵！）

洋蔥半個（略少，下次試一個）

胡椒粉少許

鹽半茶匙

面粉兩湯匙

做法：

1. 洋蔥切碎炒至微黃

2. 拌勻所有材料

3. 用湯匙拿起兩湯匙，整成圓餅形，左右交接，打出空氣

4. 用氣炸煱，180度，炸12分鐘。

哈，忘記拍完成品就食完了。。。

家姐K2之觀課日

4月8日請了一日假，

為左去家姐K2 嘅觀課日，

一早約左老公兩個食早餐，

食完就約左一班媽媽谷的靚太食（我齋坐），

有幸識著一班同學仔啱傾之餘，

不少是在職媽媽，

實在非常難得！

雖然只有5個媽媽觀課，但有8個食早餐，真難得！

坐著實在感到3個女人一個墟，

我地有兩個半墟，

嘈嘈的傾著差不多一個鐘，

慢慢行著番學校。

觀課第一個環節是看老師用英語上堂，

校長派了很多老師參加語常會的培訓，

而參加完嘅老師又會分享番比無去嘅老師聽，

所以老師們都掌握了怎樣有趣地教英文，

比起我自己喺屋企教有趣好多！

霖霖好積極舉手答問題，

呢年已經是我第三年觀課，

覺得佢進步左很多！

可能環境、老師及同學也熟悉了，

而且內容也是前兩天教過的，

所以就更有信心！

之後，就去睇分組活動，

有媽媽數過，

共有15個不同活動，

各人也有指定今個星期要完成嘅活動，

有些就自由參與，

活動有圖書、畫畫、圖工、數學、寫信、拼圖、玩具、電腦、用沙/泥膠寫字、拍字遊戲、睇烏龜等等。。。

內容都好豐富！

今次嘅內容是動物，

所以也是活動也是圍繞動物設計的，

幼師嘅頭腦真的不簡單，

要諗要做咁多個不同角落，

認真花時間準備！

看完就看外籍老師教英文，

比較下我覺得本地受過訓練幼師教得有趣清楚些，

不過，當然是外籍老師流利同較純正！

題外話，miss好靚好後生！

之後，

全部家長就同校長一同分享，

其實觀課期間，

校長都有表達佢不同的睇法，

很難得入到安強，

遇到這樣開明的校長實在是無比的福氣！

我同老公只想兩個小朋友有著開心的童年，

催谷並不是我地想見到嘅嘢！

而且亦覺人生漫漫長路，

愛上學習才是人生要學懂嘅事！

這個校長也分享了她的理念，

提及近日有學生自殺，

非常心痛！

其實，

學懂做人、學懂面對成與敗、學懂責任、學懂愛惜家人朋友。。。

比書本知識重要，

面對密密麻麻的功課/測驗，

無時間玩、無時間發夢、無時間運動。。。

興趣變成考試嘅用途，

希望將來會學懂面對，

我心裡也很想跟朋友那樣說，

盡量搵間happy school,

私校、國際學校也有很多，

但老公覺得還是最近的津校最好，

不過，有時好難講嘅，

可能這間津校也是好學校呢！

隨遇而安吧！

我想常：「船到橋頭自然直！」

雖然預早想著好像很有計劃，

但將來嘅嘢好難預計，

路路通羅馬，

只要佢找到目標，

自己努力就可以，

亦幫唔到佢太多。。。

觀完課就同兩個媽媽去日牛打邊爐，

不用帶細路、可以傾下計，

好鬼開心！

女人就是這樣，

傾下計就開心到不得了！

跟住就去H&M試衫運吉，

難得瘦了加上轉熱，

又好想買衫，

但初初轉季，咩都無折，

所以純粹試下！

試完就接放學，

接完就上y ma家，

點知諗諗下先發現無帶鎖匙！

唉，真大穫，

湊住兩個又勁多嘢（兩個書包+兩個被袋），

好彩分別上了兩個媽媽家，

不用在街流連。。。

下次真的不要忘記。。。

晚上再跟老公吃雞煲，

上次食左覺得好好味，

可能上次又凍又餓，

今次反而覺得一般，

不過，

同老公兩個拍拖食又是自在開心的，哈！

五天復活節假期（第二日：兩公婆二人世界）

因為放了兩個小朋友在老爺奶奶家，

兩公婆可以二人世界，

首先朝早就看「超人大戰蝙蝠俠」早場。

竟然朝早八點幾會勁多人已買飛，

應該是因為全日只有早晚兩場2D....

我同老公都唔鍾意3D,

又要戴眼鏡，睇完又頭暈，

最弊是唔覺得立體，

我諗好多人都有一樣睇法，

所以我地無可奈何地坐第三行看。

內容其實有點無理頭，

不過一向愛看英雄片的我主要看特技，

特技一般，

大場面震撼畫面不夠多！

看完戲，

就同老公食元氣，

再入屯門，

入到去友愛掃街，

友愛商場重整後，

好多嘢食買，

買左炸bb雞、格仔餅、燒賣同魚蛋，

再加杯珍珠奶茶，

兩個像放監咁，

因為平日湊住兩個唔食得呢d,

哈！明明喉嚨還在痛！

之後跟朋友打下PS4 NBA game,

我射波比老公還要多,

佢太咋了，哈！

玩陣就去三聖接兩個一齊同埋朋友小朋友食晚飯，

佢地先在嫲家食一碗飯打底，

因為通常外賣佢地都掛住玩唔食！

細佬最愛玩車，亦大方share比細過佢嘅小朋友玩，乖！

五天復活節假期（第一晚：煌極雞煲）

剛剛放完5日復活節假，

難得的假期，

要好好記低！

由於兩個小朋友比我地早放一日，

所以佢地會喺爺爺嫲嫲家玩兩日一夜，

所以我同老公一放工就去打邊爐，

原本想食黃大仙嘅骨煲，

但兩人只安排走廊枱，

望見都慘，

所以走左！

就去左煌極雞煲，

好味但價錢偏貴，

只吃一個雞煲+4碟嘢+1杯凍檸茶，

要400幾，

任吃骨煲會平好多。。。

叫左半隻雞，好味！想叫多半隻，但又驚食唔哂！

好大杯凍檸茶，要同老公share一些肥先得!

叫左牛、粟米同牛肚，粟米好難食，我本身好鍾意，但呢度的唔甜亦唔新鮮，牛肉唔係肥牛，好味又無咁肥！

這個叫「鬼馬蝦滑」，原以為是生的蝦滑，原來是油炸鬼加蝦滑再炸，好肥，但好味，因為有得點我最愛的甜酸醬！

無油氣炸煎壤二宝

近來決意健康飲食的我，

被氣炸煱深深吸引著，

剛巧公司抽獎送了九百元電器禮券，

就加七百幾買左個樂聲牌氣炸煱。

結果，

出奇地好用！

有些決定唔買的人會覺得功能跟焗爐差不多，

但事實是好過焗爐好多！

一、原來網底抽屜式的炸煱，

真係超方便！

食物不會粘著焗盤，

在網下面加片錫紙，

積幾次油份就掉了它，

清潔就好方便！

二、效果真係好似炸咁，

一滴油也不用加，

用焗爐焗總覺得焗到好多水來，

食物外面沒有脆嘅感覺！

這個就是無油煎壤二宝成品，

事實比用油炸的沒那麼多汁（應該大部分是油），

但我又覺得很好吃，

而且食多幾件也沒有罪惡感！

營養早餐：牛油果香草煎蛋

看了曾欣欣的專欄，

她說牛油果有豐富維他命E,

雖然是較高脂生果，

但那些脂肪也是好的，

結果就做了這份早餐！

預備時間：5分鐘

材料：

去皮方包兩片

牛油果半個

蛋一隻

香草鹽少許

做法：

1）用叉將牛油果壓成醬，搽面包

2）煎蛋做半熟狀態，加點香草鹽，搞掂！

營養換算：

2穀+1肉+3油

雖然牛油果嘅脂肪高，

但大部分也是好脂肪，

（http://eastweek.my-magazine.me/index.php?aid=3932）

間中食下也可！

黃埔一日遊

上上個星期日，

帶左兩個去黃埔，

因為去得太多Megabox,

試試新地方。

這裡是老公番工附近，

先搭細佬最愛嘅巴士，

沿路源只望著車外，

眼光被不同嘅汽車吸引住，

見到熟悉的消防車就份外興奮！

到了紅磡碼頭落車，

兩個眼光停留在海邊，

始終不太常看海，

源也特別愛看船，

唔通男仔都係愛看交通工具？

週末的放縱。。。

維持體重是我這年的目標之一，

我嘅方法是：

「星期一至五上班日三餐吃得清淡、

一星期做兩三日運動，

星期六日可以放縱一下！」

其實我唔知work唔work,

即管試下，

上星期認真放縱，

而且亦不止星期六日放縱，

先是星期四的朱古力雪榚，

星期五晚一包大熱浪薯片，

星期六日再食三件炸雞，

還有星期日中午的咸豬手+肉腸餐！

所以真的不得不膽心反彈！

太為食了！

要好好檢討一下！

幸好！

到目前還保持到體重！

星期一，

在時代廣場發現了這個任夾沙律，

這個是最細的盒要$68，

C9性格嘅我梗係有咁多裝咁多啦！

夾了兩肉左右，

其餘也是任吃，

偷加了少許芝士，

仲有哈密瓜做生果，

最好是醬可另上，

那不用怕油份過量，

最後加了一茶匙芝麻醬，真乖！

最愛的甜品..... 朱古力雪榚

唉! 為食!為食!

原本諗住健康地逛下街,買下餸, 

準備星期六日及平日的早餐.....

但經過SOGO又忍唔住買JOR GODIVA雪榚食!

說真的, 味道同麥記的朱古力差不多,

但麥記的是用雞油及一堆不知名的化合物做,

還是少吃為妙!!

自己太愛朱古力雪榚了....

明天再繼續努力跑步吧!!

這星期跑了兩次步, 

加埋明天的有三次,

一路維持期都有保持兩三次跑步的習慣,

好彩到現在減完已個半月沒有增磅,

但中間吃了不少禁品,

亦沒遵守紅、黃、綠燈的指示吃.....

之前維持期中, 

營養師派了一張紅、黃、綠燈的指示,

紅燈食物: 如炒粉面、蛋撻、雪榚等,

每星期只可吃1-2次,

黃燈食物: 如甜包、低脂芝士等,

每星期只可吃3-4次,

綠燈食物: 如白飯、三文魚等,

每星期可任吃。

已吃了一次雪榚, 

週末要小心了......

雖然為食買了雪榚,

但我也有買健康食物,

買了四個牛油果,

第一次買O既生果,

今朝看了曾欣欣O既專欄, 

http://www.etnet.com.hk/www/tc/diva/beauty_columnists_detail.php?columnists=gloriatsang&id=32438

剛巧昨晚老公又話想吃,

就決定買了!!

可以明早用來查面包再加兩片煙三文魚,

兩穀兩肉剛剛好!!

另外, 也買了一包綠茶粉,

好早曾欣欣也推介過, 

這幾個月早上都有KEEP住飲,

零卡之餘也抗氧化,

極不錯的飲料!!　

2016年目標：維持體重

Keep fit 是女人一生的工作，

以前肥肥的我，

其實也成功自行減肥兩次，

但因為缺乏運動同超愛零食，

慢慢又會肥番！

所以今次難得成功減到，

要非常嚴謹去進行以下行動，

防止重番!

每星期帶氧運動2-3次，

每次50分鐘!

每星期最少量一次體重，

如超過目標體重，

就食一兩次特別餐！

盡量跟份量食,

125磅每日是8份穀5份肉,

星期一中午外出吃，

星期二至五也帶飯及在家吃！

星期六日晚盡量在家吃

七個月減肥+維持期正式完結

今日（16年1月20日），

終於完成了七個月減肥+維持期嘅挑戰，

成功減了43.3磅，

由169.1磅減到125.8磅，

同營養師影張靚相先

（因為唔知佢介唔介意post個樣，

比副眼鏡佢戴）。

最後一次見師，

佢不停話我超越進度的好，

還sell我join一年維持期，

我婉拒了，

因為又要比二千八，好貴嘛！

而且，我覺得自己控制到，

同埋萬一真係重番，

我都學到了點減番，

最多叫老公做我嘅營養師，

唔准我亂食。

其實join完最好就係學識點食嘢，

有咩餐又唔會太餓又減到！

最好是令我動力多了，

未減前可能太重加上新陳代謝低，

成日覺得好攰，

週末就一定要狂訓，

還唔願煮飯。

但依家個人無咁攰，

又有動力煮比兩個小朋友食，

全家都可健康些！

營養師懂魔法嗎？

    自從減肥後，

最常聽到同事第一句跟我說嘅開場白就係：

「嘩！你瘦左好多呀！」

我都不太懂得怎反應，

只回應；「是啊！減肥嘛！」

     有些女同事會追問如何減嘅細節，

我說要跟餐同運動，

佢地話我都想減，

但又唔想自己煮，

又懶做運動，怎辦？

唉，呢下我更加唔識反應，

咩都唔做，又點會減到呢？

唔通營養師會懂魔法將你變瘦？

我常覺得：

「做只要一個理由就夠了！不做有無數個理由。」

任何事要改變也有不同嘅困難，

只一味往困難想，

不如行動吧！

走著走著，

就發現原來根本不是太困難吧！

維持期的我還是平日三日跟餐單吃，

兩日食低份量餐，

週六日比自己放下假，

吃些零食及出外吃，

幸好還會輕微落磅，

到達127磅了，

還有兩磅到達目標體重，

下個目標是降低一點脂肪率（現在26%），

希望降至24%，

以及維持體重，

加油努力吧！