媽媽，我好開心呀！

今日放假，朝早去左做野，做完就去接家姐放學，由於比較少機會接佢放學，每次我都盡量帶佢去玩，今次去左波波池，上次放假都想去，可惜在裝修，今次終於去到了！

行過去途中，個囡問左我好多問題，「點解你黎接我嘅？點解你帶我去波波池嘅？」買完包包比佢食又問：「點解買包包比我食嘅？」我咪答佢：「因為我係你媽媽，我好錫你，所以咁做囉！」

有時做媽媽，看到自己個囡開心地彈彈下，一邊行一邊笑住唱歌，相信已經覺得十分滿足了！有時聽佢不期然地說：「我好開心呀！」雖然對於未夠三歲的她來說，可能未確實清楚自己講緊咩，但聽到佢咁講，我感到因為我能帶比佢歡樂，真係令我感到幸福！我只想你永遠開心快樂健康！這是媽媽一生嘅期望！

細佬的第一次游水

星期日見到天氣好好，所以帶左家姐同細佬去游水，家姐今年係第一次游，而細佬就出世到依家第一次游！

上年帶過家姐游左三次，三次佢都好驚，不過一次比一次進步，由開頭落水都唔敢，去到肯行出十多步，花了我地成個鐘時間說服！

所以，今次我地都預先比定心理準備佢，話將會去游水，仲可以坐車車飛船！佢去到第一下都係唔太肯用水泡，咁我地比未知驚嘅細佬坐水泡先，爸爸就帶住傻傻的細佬行左個圈，回來家姐已經肯坐上去！這方法比起用口說服佢試易得多，因為見到細佬唔驚，做家姐的無理由咁失威，都勇於嘗試，而且過程係真係好玩，同埋舒服，所以今次游水，我地都好開心！

開心嘅係見到家姐嘅成長，到後期，佢竟然要求我唔好拖住佢隻手行，自己在水中努力向前，我比佢還要擔心，我都緊緊跟在後面，生怕佢會拌到而有意外，下次兩個也有水泡，我就可以比較放心一點了！

喺呢次游水中，發生了樣趣事，細佬竟然游游下水訓著了，當時家姐喺度好開心玩緊滑梯，可能佢太舒服，在水中間浮浮下，竟然熟訓了！幸福bb就是無時無刻都可以訓著，太神了！

兩日就倒退了

唉，星期五六晚，嫲嫲番屯門訓，第一晚霖霖就哭了，過去陪她了，第二晚索性陪佢訓，因為放假，自己想好好睡一睡，怎料星期日晚她自己訓，又再次哭個多小時，昨晚還嘔了，不忍心見她這樣辛苦，就帶她一起睡，結果爸爸就生氣了！

對，我真是太易變，又想她學會自己訓，但聽見她哭了個多小時只為找媽媽，就不忍心了！她還小。。。還沒到三歲的生日，過多幾年想她陪我訓也沒可能，唉，無奈地方不夠，不可能三個人一齊訓，我真不知該如何。。。

小寶貝長大了！

早兩日先擔心家姐唔知幾時先半夜唔喊，轉頭呢兩晚就勁乖自己訓，醒左都唔喊，唔知係朱古力引誘成功，還是她真的懂了喊也無補於事！無論如何，她這兩天也乖乖睡了，嫲嫲、爸爸和我也有覺好訓了，真開心！